By admin 
Umuzi nezimoto zowayenguNdunankulu waKwaZulu-Natal uNomusa Dube-Ncube zishiswe ngomlilo
Ukhungathekile umndeni wowayenguNdunankulu waKwaZulu-Natal ngemuva kokusha komuzi wakhe kanokusho oseKloof, eThekwini, ngobusuku.
Lo mlilo ucekele phansi nezimoto ezintathu zikaNkk Nomusa Dube-Ncube obenguNdunankulu wesifundazwe phakathi kuka-Agasti 2022 noMeyi 2024.
Akukacaci ukuthi yini imbangela yomlilo nenani lempahla elahlekele umndeni kaDube-Ncube ngesikhathi kuqubuka umlilo.
Ithimba labezicishamlilo beThekwini Fire and Emergency Services kuthiwa lizamile ukuhlenga umuzi kodwa lahluleka; ngokubonga, akekho owalimala.
Imbangela yomlilo ayaziwa
Umthombo uzwakalise ukushaqeka wathi: “Asazi ukuthi yini eqale umlilo.
“Esikwaziyo njengamanje wukuthi umuzi ushile wonke, kwasha nezimoto zakhe ezintathu ebezipake emagaraji abo.”
I-video ethathwe ngemuva kokunqanyulwa komlilo ikhombisa enye yezimoto ishe yangqongqa futhi uphahla lwendlu selubhodlozekile.
ISunday World izamile ukuxhumana noDube-Ncube mayelana nalesi sigameko, kodwa ubengakaphenduli.
Njengamanje, uDube-Ncube usethimbeni le-ANC esifundazweni, elibhekele ukwakha kabusha iqembu esifundazweni.