Owesilisa ugwetshwe odilikajele ababili ngokudlwengula indodana kamakhelwane wakhe (13)  kanye nomshana wayo (9) 

Owesilisa ugwetshwe odilikajele ababili ngokudlwengula indodana kamakhelwane wakhe (13)  kanye nomshana wayo (9)

Owesilisa waseMamelodi East ugwetshwe odilikajele ababili ngokudlwengula indodana kamakhelwane wakhe eneminyaka engu-13 ubudala kanye nomshana wayo oneminyaka engu-9 ubudala.

Ngokubika kwe Sunday World inkantolo iphinde yamvala ukuthi asebenze nezingane nokuba nesibhamu. Iphinde yengeza igama lakhe kuRejista Kazwelonke Yabahlukumezi Bocansi.

Okhulumela iNational Prosecuting Authority (NPA) esifundeni uLumka Mahanjana uliqinisekisile icala.

“Ngomhlaka-12 Ephreli 2022, lo mlisa waheha indodana kamakhelwane ekhaya layo, ethi idinga usizo lokulungisa isicabha. Wathi engaphakathi, wahluthulela isicabha, wadlwengula umfana, wathi uzombulala uma ememeza,” kusho uMahanjana.

Wabe esethi umfana akagqoke athule. Kamuva ngalolo suku, washaya umshana wakhe, abehlala naye, ngokufaka iminwe ezinqeni zengane, yopha.

Ngalobo busuku, umshana watshela unina, udadewabo wommangalelwa. Wabika ngecala ngakusasa, okwaholela ekuboshweni kwakhe. Indodana kamakhelwane, izwa ngokuboshwa, yabe isibika ukushaywa kwayo.

Bobabili abafana bathole ukwesekwa kwezokwelashwa, ngokwengqondo nangokwezomthetho esikhungweni sokunakekela izingane iMamelodi Thuthuzela Care Centre (TCC).

Enkantolo, umsolwa uyawaphika amacala, ethi udadewabo wamqamba ngenxa yengxabano yomndeni. Umshushisi woMbuso u-Andries Ntjana wethule ubufakazi obuqanda ikhanda okubalwa nobufakazi bukaDkt Lukhozi obuveza ukuthi unecala.

UNtjana uphawule ukuthi umsolwa uphume ngoshwele ngecala lokudlwengula ngo-2008, akakhombisi ukuzisola. I-Victim Impact Statements, elungiswe ne-Court Preparation Officer, uKgomotso Lodi, ichaze kabanzi ngokuhlukumezeka kwabafana. “Izimpilo zezisulu zinezilonda unomphela,” kusho uNtjana etshela inkantolo.

Ummangalelwa ucele ukuyekelelwa, ecaphuna indima yakhe emndenini, kodwa iMantshi uLynn Pillay ukuchithile lokhu. “Ukhaphele izingane ezikubona njengomalume,” kusho yena, egcizelela isimo sokudlwengulwa esilulazayo. Wabe esekhipha odilikajele.

“Lesi sigwebo sithumela umyalezo ocacile: sizolandela ubulungiswa ngokungaphezi,” kusho u-Advocate Marika Jansen van Vuuren, iBamba loMqondisi wezokuShushiswa koMphakathi.

I-NPA income ukuqapha kukamama kanye nokwesekwa kwe-TCC. Inxuse imiphakathi ukuthi ibike ukuhlukunyezwa futhi ivikele amalungelo ezingane esithunzi nokuphepha.