By admin 
Owesilisa (25) ushaye umama wakhe (48) ngefosholo washona
Esigamekweni esishaqisayo nesihlasimulisa umzimba, owesilisa oneminyaka engu-25 ubudala ushayw unina, 48, wambulala ngefosholo esigodini saseMosiane View, eMahikeng, esifundazweni saseNorth West.
Lesi sigameko sokuhlasela ngesihluku senzeke ngezithuba zabo-11:00 ngoMgqibelo, zingu-4 kuMfumfu-2025. Ngokusho kozibonele, le nsizwa ibonakala kuvidiyo ilokhu ishaya umama wayo ngefosholo, ngisho noma engasaphenduli.
Kusolakala ukuthi umakhelwane, ezama ukuvimba lesi sigameko, wadubula ebhekise kumsolwa. Umsolwa washaywa kwathi ngokuhamba kwesikhathi washona. Imbangela yalesi sigameko ayikaziwa okwamanje.
UKhomishana wamaPhoyisa osabambile eNorth West, uMajor General Patrick Asaneng, usigxekile lesi sigameko, wasichaza njengesidabukisayo, esinyantisayo futhi esingenangqondo.
“Ukufa okudabukisayo, okunyantisayo nokungenangqondo kukamama ezandleni zendodana yakhe kuwuphawu lwesishayo semikhuba yobusathane noma ukuluthwa yizidakamizwa intsha eningi echayeka kuso, futhi ngeshwa ngokuvamile abazali nomphakathi ongakhathali, ongenandaba nawo awunakwa.
“Ayikho indlela yokuthi kungathiwa azikho izimpawu eziyisixwayiso empilweni yomsolwa, uma kubhekwa ukubulawa kukanina ngedemoni. Yize naye ashona ngemuva kokudutshulwa, uphiko lweSAPS Occult Related Crimes Unit luzophenya ngokugcwele ngaleli cala ukuze kutholakale imbangela nomphumela wale nhlekelele.”
Uphenyo lwamaphoyisa lusaqhubeka, kanti iziphathimandla azikunqabi ukuthi kube nomthelela wezidakamizwa noma ezinye izinto ezinomthelela ekuziphatheni kobudlova komsolwa.