By admin 
Usomabhizinisi ubhekene nokulahlekelwa izindlu engu-17 nezimoto ezingu-7 ngecala le-Eskom Fraud
Usomabhizinisi uSiyabonga Moses Goodwill Nkosi usematheni kulandela ukuthi iSpecial Investigating Unit (SIU) ithole umyalelo enkantolo okwenza kufriziwe impahla yakhe, okubalwa izindlu ezingu-17 kanye nezimoto eziyisikhombisa ezibizayo.
Le mpahla ibikwa ukuthi ixhumene nezinsolo zokukhwabanisa imali engango-R76.5 million e-Eskom. Ngokwemibiko, uNkosi usolwa ngokuthi inkampani yakhe yayikhokhisa u-Eskom imali engaphezulu kakhulu kunenani langempela lezimpahla, okubalwa ama-relay abiza phakathi kuka-R180 no-R450 kodwa akhokhiswa ngo-R50,000.
I-SIU iveze ukuthi phakathi kuka-2021 no-2023, kukhona izikhulu zase-Eskom ezisola ukuthi zabambisana nalolu hlelo ngokuvumela ukuthengwa kwezimpahla ngamanani akhuphukisiwe ngendlela engekho emthethweni eziteshini zikagesi ezifana neKusile neMatla.
Umkhulumeli we-SIU uSelby Makgotho uthe le nqubo yokuthenga yashintshwa yaba “ibhizinisi lokuzuzisa” abantu abathile, okwaholela ekulahlekelweni yimali enkulu kahulumeni.
Lo myalelo wokufriza impahla usho ukuthi uNkosi ngeke akwazi ukuthengisa noma ukudlulisa le mpahla kuze kuphothulwe uphenyo kanye nezinqubo zomthetho.
I-SIU iqhubeka nophenyo, kanti kulindeleke ukuthi kube nezinye izinyathelo zomthetho ezizolandela.
Le ndaba iphinde yavusa ukukhathazeka ngokwanda kwenkohlakalo ezikhungweni zikahulumeni.