By admin 
Umholi Webandla LakwaShembe Uthi Usesithethelele ISilo uMisuzulu Ngemuva Kokumbiza Ngesiwula
Umholi webandla lamaNazaretha eBuhleni, uMduduzi Nyazilwezulu Shembe, uthi usesithethelele iSilo uMisuzulu kaZwelithini ngemuva kokuba kuvele ividiyo lapho iSilo sasimchaza khona “ngesiwula” ngesikhathi sixabana neNdlovukazi uNomzamo kaMyeni.
Ekhuluma phambi kwezinkulungwane zamalungu ebandla ngesikhathi somhlangano kaJulayi eBuhleni, uShembe uthe akasiboni isizathu sokuqhubeka nokubamba igqubu. Uthe usexolele iSilo futhi wanxusa namalungu ebandla ukuthi asixolele ngaphandle kwemibandela.
UShembe uthe uyakholelwa ukuthi iSilo sasiphuzile ngesikhathi sisho lawo mazwi, wengeza ngokuthi naye ujwayele ukuthukwa ngabantu kodwa akakubambeli lokho.
Lokhu kuza ngemuva kokuba iSilo uMisuzulu sesikhiphe isixoliso esisemthethweni, siveza ukuzisola ngamazwi aso futhi sathumela ithimba laseNdlunkulu ukuba liyocela intethelelo kuShembe egameni laso.
Udaba luqhubekile nokudonsa amehlo ezinkundleni zokuxhumana, lapho abaningi bencome khona isinqumo sikaShembe sokukhetha intethelelo nokukhuthaza ukuthula phakathi kweSilo nebandla lamaNazaretha.