By admin 
UGupta Mchunu Uzofihlwa NgoLwesihlanu EMsinga
UGumu “Gupta” Mchunu, obengumculi nomdansi ohamba noMaskandi uScebi “iNkosi Yamagcokama” Dlamini, uzobekwa endlini yakhe yokugcina ngoLwesihlanu eMsinga, KwaZulu-Natal.
UGupta ushone ngeSonto, mhla zingu-9 kuNcwaba 2026, engozini yemoto eRichards Bay ngesikhathi yena noScebi Dlamini beya emcimbini abebezodlala kuwo. Bobabili bashone kule ngozi, kwathi abanye ababili abebehamba nabo baphuthunyiswa esibhedlela.
Ngokusho kwesitatimende esikhishwe yiSicelu Collective, inkonzo yomngcwabo kaGupta izobanjelwa emzini wakwaMchunu, eMachunwini, eMbangweni, eMsinga ngoLwesihlanu, ngokubambisana nabangcwabi Amathole Funerals.
Abaculi abaningi bakaMaskandi nabaholi bomphakathi sebefikile emzini wakwaMchunu ukuzoduduza umndeni. Phakathi kwabafike ukuzokhalisana nomndeni kubalwa uMthandeni SK, uZanefa Ngidi kanye neSK Brothers.
Umndeni wakwaMchunu uphinde wadlulisa ukubonga kubo bonke abantu abaye basiza ekulungiseleleni umngcwabo. Kubikwa ukuthi umculi uMjolisi unikele ngenkomo, kanti usomabhizinisi uNtokozo Carz-Yome Khweqe unikele ngokudla.
NgoLwesine kubanjwe inkonzo yesikhumbuzo sikaGupta noScebi eThekwini Community Church kusukela ngehora lesi-5 ntambama, ngaphambi kwemingcwabo yabo eMsinga.
UScebi “iNkosi Yamagcokama” Dlamini yena uzofihlwa ngoMgqibelo, mhla zingu-15 kuNcwaba, emuva kwenkonzo yomngcwabo okulindeleke ukuthi ihehe izinkulungwane zabalandeli nabaculi bakaMaskandi.
Ukushona kukaGupta noScebi kushiye abalandeli bomculo kaMaskandi bedangele, njengoba laba baculi ababili bebeyingxenye ebalulekile yethimba ebelihamba ndawonye emicimbini.