By admin 
USenzo Mchunu uxwayisa ngokukhipha isahlulelo ngaphandle ‘kokuzwa olunye uhlangothi’
“Ngikulungele ukuphendula ngalezi zinsolo.”
UNgqongqoshe wamaPhoyisa osamisiwe , uSenzo Mchunu, usexwayise abantu baseNingizimu Afrika ngokukhipha isahlulelo ngaphandle kokumnika ithuba lokuphendula ngezinsolo abekwe zona.
UKhomishana wamaPhoyisa KwaZulu-Natal, uLieutenant-General Nhlanhla Mkhwanazi, usole uMchunu ngokusebenzisana nethimba lezigebengu ukuze agxambukele emsebenzini wamaphoyisa aseNingizimu Afrika (SAPS).
Ngempelasonto edlule, uMengameli Cyril Ramaphosa ubeke uMchunu ikhefu wamemezela ukuthi uzosungula ikhomishini ezophenya ngezinsolo zikaMkhwanazi.
Kodwa-ke amanye amaqembu ezepolitiki okubalwa kuwo i-Economic Freedom Fighters kanye neqembu loMkhonto weSizwe amgxekile uRamaphosa ngokungaxoshi uNgqongqoshe.
USenzo Mchunu ‘ukulungele’ ukuphendula ngezinsolo
Ekhuluma ne-SABC News ngesikhathi kunomcimbi woSuku lukaMandela lwe-African National Congress eMpangeni, KwaZulu-Natal ngoLwesihlanu mhla zingu-18 kuNtulikazi), uMchunu usivikele isinqumo sikaMengameli.
“Lezo zinsolo bezingezona ezibheke kumina kuphela, kodwa bezimelene nohide lweminye iminyango, futhi ngingasho nohlelo lwezobulungiswa ezweni lonke,” esho.
“ENingizimu Afrika, sizohlale sikwazisa futhi sigcizelela ukuthi uzwe uhlangothi olulodwa futhi ngemuva kokuzwa uhlangothi olulodwa, uzwe olunye.”
Wengeze ngokuthi ngosuku lo muntu asola ukwenza okubi, aphenye, athole ububi, ashushise, “ahlale njengemantshi nejaji,” athole omunye umuntu enecala, bese ekhipha isahlulelo, “kuyoba ukuphela kweNingizimu Afrika.”
“Lizoliqeda nya leli phupho lethu sonke esineminyaka sinalo, silwela ubulungiswa kuleli, kanti ubulungiswa busho phakathi kokunye ukuzwa olunye uhlangothi, noma ngabe icala libucayi kangakanani njengoba kulesi sigameko kodwa lalela olunye uhlangothi,” kusho uMchunu.
“Ngihlezi lapha, ngilinde ikhomishini, ngikholwa ukuthi uMengameli wazicabangisisa kahle izinto, futhi ngiyakweseka lokho.
“Yonke into inesikhathi sayo. Bekunesikhathi sezinsolo. Manje sekuyisikhathi sokuthi labo abasolwa njengami baveze uhlangothi lwabo lwendaba. Sesimi ngomumo. Ngikulungele ukuphendula ngalezi zinsolo.”
UMchunu usamile ekutheni umsulwa, wengeza ngokuthi “usebambise abameli ngalolu daba futhi udaba selusemaphethelweni.