Owesifazane, 27, uboshelwe ukushisa umuzi wesoka lakhe eLimpopo

Owesifazane, 27, uboshelwe ukushisa umuzi wesoka lakhe eLimpopo.

Owesifazane oneminyaka engu-27 ubudala uboshiwe mayelana necala lokushisa ngemuva kwezinsolo zokushisa umuzi wesoka lakhe eSteve Biko, Phase 4, ngaphansi kwendawo yamaphoyisa eVilla Nora.

Ngokusho kwamaphoyisa, lesi sigameko senzeke ezintatha zangoLwesihlanu, zingama-25 kuJulayi 2025, ngezithuba zabo-05h00.

Imibiko iveza ukuthi ummangali wesilisa ubelele ngesikhathi kufika lo athandana naye endlini wabe esengqongqoza emnyango. Kuthe uma engaphenduli kuthiwa uhlephule amawindi. Wacela usizo komakhelwane, kwathi kungakabiphi kwashiswa indlu.

Lo mlilo ucekele phansi umuzi nempahla yonke ebingaphakathi kanti umonakalo olinganiselwa ku-R520 000. Umlisa ukwazile ukubaleka engenamyocu.

Amaphoyisa aphuthume endaweni yesigameko, avula icala lokucekela phansi impahla, aqala uphenyo oluholele ekutheni umsolwa abanjwe ngempumelelo.

Lo wesifazane kulindeleke ukuthi avele eNkantolo yeMantshi yasePhalala namhlanje ngoMsombuluko, zingu-28 kuJulayi 2025, ukuze abhekane necala lokushisa.