By admin 
Umndeni wakwaMabuza ubanga ukukhokhelwa kwempesheni ka-R44.7 million
UMNDENI weSekela likaMengameli ongasekho uDavid “DD” Mabuza usembangweni wezomthetho mayelana nokukhokhelwa kwakhe impesheni ka-R44.7-million kulandela ukushona kwakhe kungazelelwe mhla zingu-3 kuNtulikazi 2025.
Indodakazi kaMabuza, uTamara Silinda, isifake isicelo esiphuthumayo eNkantolo eNkulu yokunqanda i-Alexander Forbes ekukhokheleni umkakhe uNonhlanhla Patience Mnisi yonke le mali.
Emaphepheni akhe asenkantolo, uTamara uthi uMabuza wayeshade nomama wakhe, u-Emunah Silinda, ngaphansi komthetho wesintu. Uqhuba uthi udinga uxhaso lwemali yesikole, indawo yokuhlala kanye nesibonelelo sikahulumeni sanyanga zonke, uyise abemnikeza sona esaphila.
Icala lihlelelwe ukuqulwa enkantolo ngoLwesibili oluzayo.