By admin 
Kuboshwe owesilisa oneminyaka engu-69 ngokutholakala nesibhamu nezinhlamvu okungekho emthethweni
Amaphoyisa aseVaalbank abophe indoda eneminyaka engu-69 ubudala ngokutholakala nesibhamu nezinhlamvu okungekho emthethweni ngoLwesihlanu, 07 November 2025.
Umsolwa ubanjwe ngabasebenzi basesiqiwini eMkhombo Nature Reserve ngezithuba zabo-12:00.
Amaphoyisa abizelwe endaweni yesigameko, athe uma efika athola umsolwa ephethe isibhamu sokuzingela esingenayo inombolo kanye nezinhlamvu ezimbili.
Umsolwa akakwazanga ukuveza ilayisensi yokuba nesibhamu.
Isibhamu sithathiwe kanti sizoba yingxenye yophenyo.
Umsolwa uvele mhlaka, 10 November 2025, eNkantolo yeMantshi yaseMbibane wadedelwa ngesexwayiso, kanti usuku olulandelayo lwenkantolo beluhlelelwe umhlaka-11 Disemba 2025 kuyona le nkantolo.
Ibamba likaKhomishana wamaPhoyisa eMpumalanga, uMajor General (Dkt) Zeph Mkhwanazi, ukwamukele ukuboshwa kwamalungu futhi wancoma ukuzinikela kwawo. “Sincoma isenzo esisheshayo esithathwe onogada ngokubopha umsolwa.
Lokhu kuboshwa kukhombisa ukuzinikela kwethu ekukhipheni izibhamu ezingekho emthethweni emiphakathini yethu nokuqinisekisa ukuphepha kwazo zonke izakhamizi,” kusho uMajor General Mkhwanazi.
