By admin 
Icala likaAyanda Dludla (22) lihlehliselwe umhla ka-5 Mashi 2026
Icala elibhekene noAyanda Dludla oneminyaka engu-22 ubudala lihlehliselwe umhla ka-5 Mashi 2026 ukuze kuqhubekwe nophenyo. Lesi sinqumo sithathwe yinkantolo ngenhloso yokunikeza abezomthetho isikhathi esanele sokuqoqwa kobufakazi nokuphothulwa kophenyo.
Leli cala lilandela ingozi enyantisayo eyenzeke ngoMsombuluko endaweni yaseVaal, lapho itekisi ebithutha abafundi besikole yashayisana neloli. Kule ngozi kushone abafundi abangu-14, kwathi abanye balimala kabi, kwashiya imindeni nomphakathi besesimweni sokudabuka nokushaqeka okukhulu.
Umshayeli wetekisi ubhekene namacala alandelayo:
**Amacala angu-14 okubulala**,
**Amacala angu-3 okuzama ukubulala**,
**Icala elilodwa lokungabi nayo i-PDP**,
**Icala elilodwa lokuthutha abafundi ngaphandle kwemvume (permit)**.
Kuvele enkantolo ukuthi umsolwa ukhethe ukungafaki isicelo sebheyili, okusho ukuthi uzoqhubeka eboshiwe kuze kube usuku lokuqhubeka kwecala.
Lesi sigameko siphinde savusa izikhalo ezinkulu mayelana nokuphepha kokuthuthwa kwabafundi, ukungalandelwa kwemithetho yomgwaqo, kanye nokusebenza kwezimoto ezingenazo izimvume ezifanele. Umphakathi uqhuba ukukhala ucele ukuthi umthetho usebenze ngokuqinile ukuze kutholakale ubulungiswa kubafundi abashonile nasemindenini yabo.
Icala lizobuya enkantolo ngomhlaka-5 Mashi 2026, lapho kulindeleke khona intuthuko ephathelene nophenyo nokuqhubeka kwezinqubo zomthetho.