By admin 
Kudutshulwe Kwabulawa Ababili, Ababili Balimala eMhlasini
Abesilisa ababili badutshulwe bashona kanti abanye ababili balimala ngesikhathi kudutshulwa eMhlasini, KwaZulu-Natal izolo (ngoLwesihlanu ntambama).
Amalungu eReaction Unit South Africa (RUSA) athunyelww endaweni yesigameko cishe ngo-21:51 ebusuku. Lapho efika, amaReaction Officers athole izidumbu zabesilisa ababili abadala abadutshulwe.
Kuphenywa, kutholakale ukuthi amadoda amane ayemi eduze kwe-container yokudayisa ukudla ngesikhathi imoto eluhlaza okwesibhakabhaka yohlobo lwe Volkswagen Polo, enombolo yokubhalisa engaziwa, ima eduze kwabo. Kuthiwa kwehle amadoda amathathu angakaziwa, avulela ngenhlamvu ebhekise kuleli qembu.
Izisulu zizame ukubaleka, zifune indawo yokucasha ngesikhathi kudutshulwa. Kamuva kutholakale ababili sebeshonile, betholwe beqhele ngamamitha angaba ngu-35 kuya kwangu-40 ukusuka komunye nomunye, belimele ngenhlamvu esifubeni nasentanyeni. Kutholakale nezinhlamvu eziyisikhombisa (7) ezichithakele endaweni yesigameko.
Abanye ababili balimale emilenzeni ngenxa yokudutshulwa futhi bathuthelwa esikhungweni sezempilo ngemoto yangasese ngaphambi kokufika kwamaReaction Officers. Omunye wabashonile uqinisekiswe ngumndeni wakhe endaweni yesigameko.
Imbangela yalokhu kudubulana ayikakaziwa kanti uphenyo luyaqhubeka.
