Isikhulu sikamasipala waseMgungundlovu sisaywe wugesi sashona ngesikhathi sigeza

Isikhulu sikamasipala waseMgungundlovu sisaywe wugesi sashona ngesikhathi sigeza

Isikhulu sikamasipala waseMgungundlovu sibanjwe wugesi sigeza emzini waso eRidge Park ngaseGrange eKZN ngoMgqibelo ekuseni.

Iphephandaba iThe Witness libika ukuthi izikhulu zikamasipala sezikuqinisekisile ukuthi kunengozi ebulalayo ehlobene nokuxhunywa kukagesi ngokungemthetho kwenye indawo engaphansi kwedolobha.

Isisulu, uJoseph Nkhethi, 53, ubehlala kuBotha Street futhi esebenza njengesikhulu sokuphatha eMnyangweni wezomgwaqo kuMasipala uMsunduzi.

Wayelungiselela ukuya emakilasini ekolishi lendawo lapho kwenzeka le nhlekelele.

Udadewabo kaNkhethi, uJasenta Dlamini, uthi wezwa imisindo endlini yokugezela ngaphambi kokuba amthole kubhavu.

Uthi: “Ngesikhathi ngimkhipha ngezwa ngishaywe wugesi, kodwa ngaqhubeka ngaze ngamkhipha ngokuphelele.

“Kunzima ukukholwa ukuthi akasekho, siwumndeni omkhulu wezelamani, mina nezingane zethu siphila njengabafowethu nodadewethu, ubengumuntu oyinhloko ekhaya, owondlayo.

“Buka le ndlu ukulungiswa akukaqedwa, njengoba engasekho, sizobhekana kanjani nalokhu? Siphatheke kabi ngokudlula kwakhe emhlabeni.

Umndeni umchaze njengesisekelo somuzi wabo, othwele amathemba okulungisa nokwandisa umuzi wawo.

Izakhamuzi zakule ndawo zithe sezivimbe izingane zazo ukuthi zisebenzise amabhavu, amashawa noma ompompi bangaphandle ngenxa yokwanda kukagesi okuphindelelayo.

UMampezi Msomi uthi ugesi wakhe ukhubeke kaningi ngoLwesine olwedlule, kanti ibhodi eliwuhambisayo likhiphe izinhlansi.

“NgoLwesihlanu kufone umakhelwane wami wangibuza ukuthi ngisanenkinga yini njengoba eyakhe isaminca, sesisaba nokuthinta amanzi ngenxa yalokhu.

“NgoMgqibelo omunye umakhelwane wangifonela engitshela ukuthi ushonelwe umfowabo, ngikholwa ukuthi ngabe bekungavinjwa ukube lolu daba belusingethwe ngendlela,” usho kanje.

Esinye isakhamuzi uMnuz Isaac Mncwabe sithi: “Sinezingane nezalukazi emakhaya ethu, kungani kwadingeka ukuthi kuthathwe impilo ngaphambi kokuba iziphathimandla ziqaphele?

“Idolobha kufanele lithumele ithimba elizophenya yonke indawo ukuze kunqandwe abanye abalimala.”

Ikhansela laku-ward 24, uMnuz Jerome Nkabini, ukuvumile ukuthi kube nokwanda okwenzeka ngezikhathi ezithile labe seluleka izakhamizi ukuthi zifake izinombolo zezingcingo esikhungweni sezingcingo ukuze kuthunyelwe ochwepheshe abazophenya.

Okhulumela umasipala uNtobeko Mkhize uthe uphenyo seluqalisiwe, kodwa imibiko yokuqala iqinisekise ukuthi ugesi uphezulu endaweni.

“Imibiko yokuqala ikhomba ukuthi umsebenzi ubanjwe wugesi ngesikhathi egeza. Ochwepheshe bakagesi kumasipala bathola i-voltage ephezulu ngendlela engavamile, okutholwe ukuthi ixhumeke ngokungemthetho endaweni eseduze yokusabalalisa izintambo. Ikhebula elingekho emthethweni lakhishwa ngokushesha.”

Uchaze lesi sigameko njengesibi nesingagwemeka.

“Ukuxhunywa ngokungemthetho kubeka engcupheni impilo, ukulinyazwa kwempahla kanye nokuphazamiseka kwemisebenzi.Udaba selubhalisiwe kwaSAPS, uphenyo lusaqhubeka.

“Idolobha lidlulisa amazwi enduduzo emndenini olahlekelwe, ozakwabo eMnyangweni wezokuThutha kanye nomphakathi wonkana.”

Umasipala unxuse izakhamizi ukuthi zibike ukuthi zixhumene nalesi sikhungo ngokungemthetho ngokushayela isikhungo esisebenza amahora angu-24 ku-0800 001 868 noma zisebenzise inombolo yocingo ethi 0801 000 545.

Akukhona okokuqala kwenzeka inhlekelele enjalo.

NgoMashi, iThe Witness yabika ngowesifazane oneminyaka engu-20 ubudala kanye nengane yakhe abashona ngemuva kokushokhwa ugesi ngokuxhunywa ngokungemthetho ngesikhathi belenga bewasha endaweni yaseSwapo e-Copesville.