By admin 
I-Patriotic Alliance (PA) isizwakalise ukulethemba iPhini likaMengameli omisiwe, uKenny Kunene, yathi uzovunyelwa ukuthi angenele ukhetho lobumeya yaseGoli.
Umholi we-PA, uGayton McKenzie, umemezele ukuthi uKunene uzomela iqembu eGoli ngesikhathi ebukhoma kuFacebook kuleli sonto. Lokhu kwenzeka nakuba emisiwe emsebenzini ngemuva kokutholakala emzini kamsolwa wokubulala uKatiso “KT” Molefe.
Uphenyo lwangaphakathi lusungulwe yiqembu ukuze kuphenywe ngezinsolo zokuthi uKunene uyathinteka noMolefe.
Engxoxweni abe nayo neNewzroom Afrika, okhulumela i-PA uSteve Motale uthe nakuba kusaphenywa, uKunene akazibandakanyi nanoma yiziphi izinto zeqembu kodwa uzongenela isikhundla sobumeya yaseGoli.
“Ukuze akhankase, sizolinda kuphothulwe uphenyo bese esulwa, ngemuva kwalokho aqhubeke nemisebenzi yeqembu,” kusho uMotale.
Uqhube wathi iqembu likholelwa ukuthi uKunene umsulwa, kodwa uma imiphumela ibuya ngokumelene naye, iqembu lizothola ozovala isikhala sakhe.
‘Sisalindile’: McKenzie ophenyweni ngoKenny Kunene
Umholi we-PA uGayton McKenzie usenxuse abalandeli bakhe ukuthi babekezele njengoba kusaphenywa ngesekela lakhe uKenny Kunene.
“Siyathemba ukuthi uphenyo luzomsula, siqoke inkampani yabameli yangaphandle ehlonishwayo ngoba sifuna uKunene ageze igama lakhe ukuze uma ebuya angabi nalo ifu elimnyama ekhanda lakhe.
“Uma kwenzeka kuba nezinsolo ezingezinhle ngaye, uKunene ngeke aze alinde ngisho ukuthi iqembu likhiphe isimemezelo. Uzozidela ngokuzithandela izikhundla zakhe eqenjini kanjalo nokuba yimeya yedolobha.”
UMotale uthe ukumenyezelwa kokukhethwa kukaKunene akuyona into entsha.
“Kwamenyezelwa ezinyangeni ezimbalwa ezedlule, ngaphambi kwezigigaba ezingezinhle.Okwenziwe uMcKenzie wukumqinisekisa nokwenza izinguquko ezimbalwa kwabanye ababengenele ukhetho lobuMeya.
“Akusona isimemezelo esisha. Sekuphele izinyanga ezimbalwa ebambe isikhundla sokuba yi-PA esikhundleni sikameya waseGoli.”