By admin 
UMengameli waseGhana ufuna i-AU ixoxe ngodaba lodlame olubhekiswe kubantu bokufika eNingizimu Afrika
UMongameli waseGhana, uJohn Mahama, usephinde wacela ukuthi i-African Union (AU) ixoxe ngokwanda kodlame olubhekiswe kubantu bokufika abangekho emthethweni eNingizimu Afrika.
UMahama uthi udlame olubhekiswe kubantu bokufika seluya ngokwanda futhi lusongela ubumbano phakathi kwamazwe ase-Afrika.
Lo Mongameli uthe i-AU kumele ibhekane nalolu daba, njengoba ukungezwani phakathi kweNingizimu Afrika namanye amazwe ase-Afrika kuya ngokuya kukhula ngenxa yezinsolo zokuhlaselwa kwabantu bokufika.
Kuthiwa abantu bakwamanye amazwe, okuhlanganisa nabantu baseGhana, babhekene nokwesaba ngenxa yemibhikisho kanye nezenzo zodlame ezibhekiswe kubantu abangekho emthethweni eNingizimu Afrika.
Kuphinde kwabikwa ukuthi abantu ababili baseGhana bafake isicelo kwi-International Criminal Court (ICC), becela ukuthi kuphenywe ngezinsolo zokuhlaselwa kwabantu bokufika eNingizimu Afrika. Nokho, uhulumeni waseNingizimu Afrika ukuchithile lokho, wakubiza ngokuthi yisenzo esenziwa ngezizathu zepolitiki.
UMahama uthi udaba lokufuduka kwabantu kanye nokuhlaselwa kwabokufika akumele lushiyelwe emazweni ngamanye kuphela, kodwa kumele lube yingxoxo yezwekazi lonke.
Uthi i-Afrika kumele ithole izixazululo ezizobhekana nezimbangela zokufuduka kwabantu, ukuntuleka kwemisebenzi kanye nezinye izinkinga ezidala ukungezwani phakathi kwezakhamuzi nabantu bokufika.