KUDLULE EMHLABENI IKHANSELA LE-DA ETHEKWINI UWELEKAZI SIBIYA

Sekudlule emhlabeni uWelekazi Sibiya, obengu-PR Councillor we-DA eThekwini.

I-DA KwaZulu-Natal isizwakalise ukudabuka ngokushona kukaSibiya, imchaza njengomholi osemusha obezinikele emsebenzini wakhe futhi elwela ukuthuthukiswa kokulethwa kwezinsiza kanye nokuba khona kokuziphendulela kubaphathi.

Iqembu lithe ukushona kwakhe ukulahlekelwa okukhulu KwaZulu-Natal, ikakhulukazi kubantu abebemazi futhi besebenza naye.

I-DA iphinde yadlulisa amazwi enduduzo emndenini kaWelekazi Sibiya, kubangani, ozakwabo kanye nabo bonke abathintekile ngokudlula kwakhe emhlabeni.

Ukushona kwakhe kushiye usizi phakathi kozakwabo kwezombusazwe nakulabo abebesebenza naye eThekwini.