UZUMA UTHI UYOZE AFE EYILUNGU LE-ANC

Lowo owayenguMengameli waseNingizimu Afrika, uJacob Zuma, usephinde wakubeka kwacaca ukuthi akazimisele ukulahla ubulungu bakhe be-African National Congress (ANC), yize esehola iqembu lezombusazwe eliphikisayo, uMkhonto weSizwe Party (MKP).

UZuma uthi ubudlelwano bakhe ne-ANC buyingxenye ebalulekile yomlando wakhe wezombusazwe kanye nohambo lwakhe emzabalazweni wenkululeko. Uthi akazimisele ukuvuma ukuthi ubulungu bakhe kule nhlangano buyasuswa.

NgoNhlolanja (February) 2026, ngesikhathi ekhuluma emcimbini wokwethulwa kwencwadi ekhuluma ngempilo kankosikazi wakhe wokuqala, uSizakele Khumalo-Zuma, uZuma waphinde wagcizelela ukuthi uzolwa ukuze agcine ikhadi lakhe lobulungu be-ANC.

UZuma uthi nakuba engazimisele ukusebenzela i-ANC ngaphansi kobuholi obukhona njengamanje, akakwazi ukukhohlwa iqhaza elabanjwa yile nhlangano empilweni yakhe nasemzabalazweni wokukhulula iNingizimu Afrika.

Njengoba kwaziwa, uZuma waxoshwa ngokusemthethweni kwi-ANC ngoNtulikazi (July) 2024 kulandela ukweseka kwakhe iMK Party, ayiholayo njengamanje.

Naphezu kokuxoshwa kwakhe, uZuma usaqhubeka nokugcizelela ukuthi ngokomlando nangokwenhliziyo yakhe, usazibona eyingxenye ye-ANC.

Lokhu kushiya kunemibuzo ngobudlelwano bakhe ne-ANC, njengoba eqhubeka nokuhola iqembu eliphikisana nayo kwezombusazwe.